அமெரிக்காவின் இரகசிய உளவுத்தகவல்கள் இணையத்தில் வெளியிட்ட விக்கி லீக்ஸ்
Posted by Kattankudi Web Community (KWC) on 28/07/2010
ஆப்கானிஸ்தானில் இயங்கும் அமெரிக்க உளவுப்படையினரால் ரகசியமாக சேகரிக்கப்பட்ட போர் தகவல்கள் மற்றும் உளவுத் தகவல்கள் அடங்கிய பெரும் தொகையான ஆவணங்களை இணையத்தில் வெளியிட்டு பரபரப்பை ஏற்படுத்தியுள்ளது விக்கி லீக்ஸ் எனும் இணையத்தளம்.
விக்கிலீக்ஸ் என்ற இணையத்தளம் சுமார் 92ஆயிரம் ஆவணங்களை The New York Times, The Guardian, Der Spiegel என்ற பிரபல பத்திரிகைகளுக்கு வழங்கியது.
அவை குறிப்பிட்ட ஆவணங்களை அலசி அதில் முக்கியமான தகவல்களை தொகுத்து முதலில் வெளியிட்டன.அதேவேளை விக்கிலீக்ஸ் இணையதளத்திலும் அனைத்து ஆவனங்களும் வெளியிடப்பட்டது. இவ்வாறு வெளியிடப்பட்ட ஆவணங்களால் உலகம் முழுதும் பெரும் அதிர்ச்சி அலைகள் ஏற்பட்டுள்ளன. அதில் குறிப்பிட்ட விபரங்கள் எதுவும் உண்மையில்லை என பாகிஸ்தான் அரசு மறுத்துள்ளது.
அமெரிக்காவுக்கும் பாகிஸ்தானுக்கும் இடையேயான முக்கியத்துவம் வாய்ந்த பேச்சுவார்த்தைகளை குலைக்கும் ஒரு சதியாக இந்த ஆவணக் கசிவுகள் இருக்கலாம் என பாகிஸ்தானின் அதிபரின் பேச்சாளர் தெரிவித்துள்ளார்.
இணையத்தில் வெளியிடப்பட்ட ஆவணங்களில் ராய்டர் செய்தியாளர்கள் இருவரை பொதுமக்களுடன் சேர்த்து விமானத்தாக்குதல் மூலம் அமெரிக்க படைகள் சுட்டுக்கொல்வதாக கூறப்படும் படங்களும் இருக்கின்றன.
இருக்கும் ஆவணங்களை பகுதிபகுதியாக வெளிநாட்டு ஊடகங்கள் மற்றும் இணையத்தளங்கள் செய்திகளாக வெளியிட்டு வருகின்றன.
